JACQUES ESCLASSAN

Jacques Esclassan naceu en Castre, Tarn (Francia), o 3 de setembro de 1948.

Foi un ciclista francés, rodador e velocista de bastante valor nos tempos de Eddy Merckx e Bernard Hinault, que se mantivo fiel ao equipo Peugeot durante toda a súa carreira profesional.

Fillo dunha familia de artesáns, de espírito libre que desde neno era brillante, nervioso e rápido. Os que o lembran na súa infancia din que gañaba cada domingo, converténdose nun referente e case un semidiós. Vinte e dúas vitorias de amateur en 1970, trinta e tres en 1971 e trinta e dous en 1972.

Profesional de 1973 a 1979, cuxos maiores éxitos deportivos logrounos no Tour de Francia onde ademais de obter cinco triunfos de etapa logrou impoñerse na clasificación por puntos na edición de 1977, e na Volta a España onde tamén lograría unha vitoria de etapa na edición de 1973.

TRIUNFOS: 1973, vencedor dunha etapa da Volta a España, dunha etapa da París-Niza e dunha etapa do Tour de l´Oise.

1974, vencedor da Estrela Besseges, máis unha etapa e da Besseges-Alés.

1975, vencedor do Critérium Nacional, dunha etapa do Tour de Francia, dunha etapa da París-Niza e dunha etapa do Tour de Limousin.

1976, vencedor dunha etapa do Tour de Francia, dunha etapa da París-Niza, de dúas etapas do Tour d´Indre-et-Loire, dunha etapa do Tour de Corse e dunha etapa do Gran Premio de Midi Libre.

1977, vencedor do Tour Tarn, máis unha etapa, dunha etapa do Tour de Francia e a clasificación por puntos.

1978, vencedor do G. P. Peymeinade, de dúas etapas do Tour de Francia, de dúas etapas na París-Niza, dunha etapa da Dauphiné Libéré, de dúas etapas do Tour de Tarn, dunha etapa do Tour de l´Oise e dunha etapa do Gran Premio de Midi Libre.

1979, vencedor do G. P. Antibes, dunha etapa do Critérium Internacional, dunha etapa do Tour de l´Oise, dunha etapa do Tour de Corse  e do G. P. Mónaco.

Nunca participou no Xiro de Italia.

TOUR DE FRANCIA: 1973 (68º), 1974 (75º), en 1975, antes de terse que retirar gaña unha etapa, 1976, (80º, máis unha etapa), 1977 (28º, máis unha etapa e a clasificación por puntos), 1978 (61º, máis dúas etapas) e en 1979 retírase antes de finalizar a carreira.

VOLTA A ESPAÑA: 1973 (29º, máis unha etapa).

EQUIPOS: 1973-1979, Peugeot-BP-Michelin.